ગુજરાતમાં સાર્વત્રિક વરસાદ પર આવેલા તમામ નદી નાળાઓ છલકાઈ રહ્યા છે ત્યારે રાજ્યમાં આવેલા કુદરતી સૌંદર્યના ખજાના સમા અનેક ધોધ પણ પોતાની પૂર્ણ ક્ષમતામાં વહી રહ્યા છે. ત્યારે સૌરાષ્ટ્રમાં આવેલ પ્રસિદ્ધ જમજીરનો ધોધ જોઈને તમને થશે કે આ તો કોઈ હોલિવુડની ફિલ્મનો સીન છે કે શું

વરસાદની આ આલ્હાદક ઋતુમાં કુદરતના ખોળે વહેતા ધોધ અને ઝરણાઓનું સૌંદર્ય સોળે કળાએ ખીલી ઉઠતું હોય છે. તેવામાં આપણા ગુજરાતમાં પણ કેટલાક એવા ધોધ છે જેની મુલાકાત તમે આ વરસાદની સીઝનમાં લઈ શકો છો.

ગુજરાતમાં આવા ધોધ ડાંગ જિલ્લામાં, અરવલ્લીના પહોડોમાં આવેલા છે તેવી જ રીતે સૌરાષ્ટ્રમાં પણ એક જાજરમાન ધોધ આવેલો છે. આ ધોધ એટલે પ્રસિદ્ધ જમજીરનો ધોધ જે છેલ્લા 15 દિવસથી ગીર પંથકમાં પડી રહેલા અવિરત વરસાદ બાદ ગીરના જંગલમાં ત્રાડ પાડતા ડાલમથ્થા જેવા અવાજ સાથે વહી રહ્યો છે. શિંગોડા નદી પર આવેલા આ ધોધને જોવા માટે લોકો દૂર દૂરથી ઉપડી રહ્યા છે.

ગીરના જંગલો વચ્ચે આવેલ છે જમજીર ધોધ

કોડિનાર તાલુકા અને ગીર ગઢડા તાલુકાની સીમા પર આવેલા આવેલા ગીર જંગલ નજીક ભગવાન પરશુરામજીના પિતા જમદગ્નિ ઋષિના આશ્રમ પાસે શિંગોડા નદી પર આવેલો છે. ગીરના જંગલ વચ્ચે આવેલો આ ધોધ પ્રાકૃતિક સૌંદર્યથી ભૂરપૂર છે અને હાલ ચોમાસામાં સમયમાં પોતાની પૂર્ણ ક્ષમતાએ વહેતો આ ધોધ બાહુબલી મૂવીના ધોધની યાદ અપાવે છે. આ ધોધ દેખાવમાં જેટલો સુંદર લાગે છે તેટલો જ જોખમી પણ છે. કારણ કે ધોધ પર જવા માટે કોઈ રસ્તો નથી. નદીના ઉતરી ગયેલા પાણી વચ્ચેથી જવું પડે છે તેમજ આસપાસમાં ઘણો શેવાળ હોવાથી ફરવા આવતા સહેલાણીઓ ઘણીવાર ધોધનો નજારો અને સેલ્ફી લેવામાં મસ્ત થઈ જતા પગ લપસીને ધોધમાં પડવાથી કરૂણ મોત થયાના પણ અનેક દાખલા છે.

સરકાર પ્રવાસન ક્ષેત્ર તરીકે વિકાસ કરે તો વધુ પ્રવાસીઓ આવે

જોકે તેમ છતાં મોટી સંખ્યામાં દર વર્ષે અનેક સહેલાણીઓ આવે છે. તેવામાં સ્થાનિકોની માગણી છે કે આ વિસ્તારને પ્રવાસન ક્ષેત્ર તરીકે વિકસાવવામાં આવે અને ધોધની આસપાસ પ્રવાસીઓ માટે સુરક્ષિત સ્થાન બનાવવામાં આવે.

તમે આ ધોધ માટે 4 અલગ અલગ સ્થળેથી પહોંચી શકો છો. જેમાં આ ધોધ કોડીનારથી 25 કિમી, ઉનાથી 41 કિમી, દીવથી 58 કિમી, સોમનાથથી 46 કિમી, સાસણથી 58 કિમી થાય છે. આ ધોધની આસપાસ પણ કુદરતી સૌંદર્યથી ભરપૂર અનેક સ્થળો છે.